الدليل الشامل في تحسين بطارية اندرويد

مهما كان الاختلاف بين الناس بمواصفات الجوالات وتفضيلاتهم، إلا انه ما يختلف اثنين على ان موضوع البطارية من أهم الأشياء بالجوال ولازم تطويرها وتحسينها.

الأندرويد له مزايا وعيوب من هالناحية. من جهة، الاندرويد يعطيك حرية كاملة بالبرامج وتعدد المهام وتعدد الاشياء اللي تشتغل عندك بالخلفية بنفس الوقت. يعني يكون الجوال عندك يشييك البريد، يجلب لك الأخبار على سطح المكتب، يشوف هل رد عليك احد في فيسبوك والا لا، أو حتى برامج تشتغل بالخلفية علشان تفحص الضغط الجوي وترسله بشكل مستمر للسيرفر المختص بهالبحث. لكن من الجانب الآخر للموضوع، هذا يشكل تحدي وكل هالاشياء هذي لما تشتغل بالخلفية فهي تستهلك من المعالج والذاكرة وبالتالي من بطارية الجهاز. هذا كان سبب بحثي في هالموضوع وكتابتي لهالمقال في تحسين بطارية اندرويد، وان شاء الله اقدر اقول اني وجدت حلول جدا ممتازة!

أول شيء قبل نبدأ في تحسين بطارية اندرويد خلونا نتكلم عن الطرق الصحيحة لقياس استهلاك البطارية. أحسن برنامج قياس استهلاك البطارية وجدته هو برنامج اسمه BatteryDrain. أول شيء طبعا البرنامج شكله وتصميمه جدا جميل وماشي على اسلوب الهولو حق جوجل. وثاني شيء البرنامج استخدامه بسيط ويقدم لك معلومات ممتازة.
البرنامج طريقته بسيطة. يحسب لك كم نسبة نقص البطارية بالساعة. يعني لو قلنا انه عطاك قراءة انه نقص البطارية هو 20% بالساعة، معناته ان جوالك يبي يجلس 5 ساعات وتخلص بطاريته. بينما لو عطاك قراءة انه جوالك ينقص 5% بالساعة فهذا يعني انه جوالك يبي يخلص شحن خلال 20 ساعة. طبعا من خلال استخدامي وتجربتي، اذا جت عندك نسبة 5% فهذا يعتبر شيء مرة ممتاز.

هنا صورتين للبرنامج حق قياس بطارية الاندرويد. الصورة الأولى كانت أثناء استخدامي للجوال وطبعا الشاشة تصرف والواي فاي يصرف وكانت النسبة تقريبا على 15%. الصورة الثانية كانت للجوال وهو بدون استخدام ثقيل وأيضا بعد تطبيق النصائح اللي باسردها لكم في هالمقال وكانت حوالي 2%.

استهلاك البطارية بعد تطبيق الدليل الشامل في تحسين بطارية اندرويد بالمقارنة مع استهلاك البطارية قبل تطبيق الدليل الشامل في تحسين بطارية اندرويد

طريقة تحسين بطارية اندرويد:

في هذا الدليل، فيه ثلاث طرق لتحسين بطارية جوالات الأندرويد. الطريقة الأولى بإلغاء تتبع المكان في خرائط جوجل وهذي طريقة سريعة وبسيطة وفعّالة وما تحتاج روت للجهاز. والطريقتين اللي بعد هذي هم باستخدام برنامجين يحتاجون روت للجهاز وفعّالين أيضا وهم DS Battery Saver و Greenify.

إلغاء خاصية تتبع موقعك في خرائط جوجل:

هذي تعتبر أبسط وأسهل وأسرع طريقة لتحسين بطارية الأندرويد. وهي عبارة عن تعطيل خيار التتبع في جوجل مابز. الميزة هذي بالعادة تكون مفعّلة علطول على كل جوالات اندرويد وهذي تعطي تتبع كامل لتحركاتك علشان تشوفها في حسابك عند جوجل. أحسن شيء ان الخيار هذا ما يحتاج رووت (فك حماية الجهاز) وتطبيقه بسيط جدا وأثره كبير جدا على البطارية.

لتعطيك خاصية التتبع في خرائط جوجل:

  1. افتح برنامج خرائط جوجل
  2. افتح قائمة الخيارات وادخل شاشة الإعدادات
  3. اختر الخيار الثاني وهو خيارات الموقع
  4. بعدها تشيل الصح من ثاني خيار وهو اللي يقول لك “إرسال الموقع من هذا الجهاز”.

وهنا صورة توضح كيفية تطبيق هالنقطة:

تحسين بطارية اندرويد بسهولة

طريقة برنامج DS Battery Saver:

الطريقة اللي يشتغل فيها هذا البرنامج بسيطة وتم تجربتها من قبل عدد كبير من مستخدمين اندرويد ولاقى شعبية كبيرة. طريقته بكل بساطة انه متى ما كانت شاشة الجوال طافية وانت ما تستخدمه، يروح ويطفي كل الأشياء اللي تشتغل بالخلفية لمدة معينة (بالعادة ساعة وعلى حسب الإعدادات) وبعدين يشغلهم لمدة بسيطة علشان يسحب الإيميلات والتنبيهات (المدة البسيطة تكون دقيقة أو دقيقتين) … وبهالشكل بدل ما يكون جوالك يشتغل 100% من الوقت، يصير كل شيء طافي لمدة ساعة بعدين يسحب الايميلات خلال دقيقة وينبهك اذا جاء شيء وعقبها يطفى لمدة ساعة ثانية. وهذا شيء اثره واضح في زيادة عمر بطارية اندرويد.

انا خليت بالاعدادات عندي يصير طافي 15 دقيقة ويشتغل لمدة 1 كل ربع ساعة. صح انه مهوب طافي فترات طويلة لكن لا يزال حسّن عندي البطارية والاستهلاك بشكل كبير.

البرنامج يمكن تحميله من هنا.

تطويل عمر بطارية اندرويد

نصائح لتحسين الاستخدام مع برنامج DS Battery Saver Pro:

حاول انك تضيف البرامج اللي تحتاج انها تشتغل بالخلفية وتستخدم انترنت مثل برامج الستريمينج وباندورا Pandora و برامج الراديو في القائمة البيضاء للبرنامج White list.
بهالطريقة البرنامج ما يقطع الاتصال اذا احد هالبرامج قيد الاستخدام

طريقة برنامج Greenify: (يحتاج روت)

برنامج Greenify طريقة جدا جميلة. البرنامج يحط البرامج اللي تحددها له في سبات عميق تقريبا. وما يسوي العملية هذي الا اذا كنت ما تستخدم البرنامج أو اذا كانت شاشة الجوال طافية. طبعا هالميزة هذي جبارة جدا وتخليك تريح بالك من أي برامج جالسة تشتغل في الخلفية من دون علمك. ممكن طبعا انك تختار اي برامج وتقدر تحط فيسبوك وتويتر والشغلات هذي ضمن قائمة السبات العميق، وبهالطريقة ما راح يستهلكون البطارية إلا اذا انت احتجت شيء ورحت وشغلتهم.
أنصح طبعا انك تحط بالقائمة حقت السبات اكثر عدد من البرامج، باستثناء طبعا البرامج اللي تهمك ويهمك انه تنبيهاتها تجي بوقتها ومهوب اذا انت رحت وشغلت البرنامج. مثلا عندي انا ما حطيت برنامج واتسآب لأني ابي اعرف اذا جاء احد وكتب لي شيء في لحظتها، وما ابي واتسآب يدخل في سبات عميق وما يعطيني تنبيهات رسائل الا إذا انا شغلته.

البرنامج يمكن تحميله من هنا.

طريقة تطويل عمر بطارية اندرويد

نصائح لبرنامج Greenify:

لا تحط إضافات سطح المكتب من ضمن قائمة السبات العميق هنا. لأنه لو سويت كذا ما راح تجيك التحديثات ويبي يصير شكلها غبي.
أيضا لا تحط برامج تشغيل الملفات الصوتية والاغاني، لأنه فجأة وانت تسمع الراديو أو شيء يبي يقفله عليك اذا طفت الشاشة.

اذا أعجبتك المعلومات في هذا الدليل ممكن تسوي لها تويت أو تنشرها في فيسبوك عن طريق الأزرار اللي تحت. وبالتوفيق للجميع 🙂


       

Comments (2)

  1. Pingback: طريقة تفعيل واتس آب WhatsApp على أجهزة أندرويد التابلت اللوحية | مدونة سليمان

اترك رد